نبدا كلامي بسلامي
على رفاگي وحبابي
نسرد لكلام
وتصغى لودان
السر لكنان
وصوت المكتوم فالبدان
زيد قرب وسمع
حكاية هاذ الدنيا
من صندوق عصري
صورة من تلفازة
والواقع حصري
ويلا فهمتي يا خيي قصدي
نعطيك النص من قصري
لحكاية فشارع كلام قبيح
وفصورة تسحسيح
شي فالمعيشة دمو يسيح
وشي هاني نشر الشيح
هذا بين لفقيه والشيخ
وهذا مكسل غارق فتكسيح
هذا عجب فصيح
فصندوق فريد وصحيح
غير قرب وسمع
راه فالزحام ضاع الياقوت
ما نفعات مشاريع التقلاب
وتراب ملطخ
منصوب فيه الفخ
والخلق تلف
قرب يعدف
وتقل لكتف
وكثر النبيح
وصوات كتجتر
وحرب قايمة تجر
هذا يشكي بالضر
وهذا مسكين تقهر
الجو تمزج فالبلادة
ورفع فالزيادة
آش تگول : يا هذا
عادة يتعادة
كلشي فيه عادة
على صح الگول : يا سادة
فصندوق الدنيا العصري
شلا حكاية ماليها نهاية
واحد من زوج
إما .. وإما
تسليم بدون شروط
قيلا يعيش .. قيلا يموت
صداع وغوت .. وحرب وموت
وسرار ما فيها معاودة
حيت لازمة العادة
وهبال فهبالوا تعادة
هذا واحد من زوج
حجاية ليها حكاية
بلارج كان قاضي
وطبيبت كانت ولية
والمش كان نجار
والغراب خزين النار
وزيد عليهم الحمار
كان أمين فالبلاد
نقطة نظام .. ورتب لكلام
حكاية الجد ما فيها رد
كان يا ما كان
فالح مالح .. صالح فالح
وللي ما صالح ما فالح
غير حتاط .. كاين التخلاط
اللي بان عالأنظار
باغي نفار
راه الحال تعكر وخزز
وصبح كايقزز
يسكت ضرب الفگد
راه من كثرت الخوف
حطوك فالرفوف
وعلاش الفرد .. يتعاقب بالطرد
ويتسد المنفد
باين هذا ضد .. نزل بالقصد
وشي ناس .. هما الأساس
عطي السلام .. وسرط الجام
واللي بغي يصول
ها الطبالي عريضة ومستديرة
والناس كاينة .. والأقلام موجودة
وحرية التفكير والتعبير
وتقرير المصير
وعدم التدخل فشؤون الغير
الكل مقبول .. إنما بشرط
عبر الكلام .. وصرف الحروف
وتحدا الخوف
على قدر لكلام
راه أهل مكة .. أدرى بشعابها
وأهل الحق .. أدرى بالشعاب
والإعلام .. والسلام
باقي شي تعقيب .. قبل ما نغيب
واضح .. وفاضح .. لازم يكافح
ملفات الأزمات .. كلها مطالبات
الملف الأول .. عليه تعول
والملف الثاني تحول
من التهميش .. الفرض الذات
والملف الثالث .. حق الناس يا سادت
والرابع تابع جميع المستلبات
من سرار وحكايات
ما كاينة راحة
حتى تزول هاذ القباحة
ونشرطو الجدري .. الناس تدري
والمسألة بسيطة
علاش أبويا
يتمرد خويا
علاش أمي
بويا يقتل عمي
وتقوى الكروب
علاش أحبيبتي
يهدموا بيتي
وحقنا مسلوب
ياك حنا خاوة
وعلاش الهراوى
واحد من زوج
قرب تسمع
حكايت ذوك زوج حروف
حروف القضية
قضية التخت فاش حنا
ف المعركة قتلى
وف الضمير قتلى
وفالوجود قتلى
هكذا تكون القومية وإلافلا
فالخبار الزربة .. والتزرزيف
وكثروا ف التزييف
صاب الرأي والتعبير
سياسة فاشلة .. فاش حنا
وصمت لاش .. وعلاش
بكليمة .. وكليمة
تكبر الصيحة .. فوجه الفضيحة
نقطة نظام .. ورتب لكلام
عطي السلام .. وسرط الجام
تعليقات:
